بالائی کے سیخ کباب

اجزاء

خشک قیمہ (چربی، چکنائی اور پانی بالکل نہ ہو) >>> ایک کلو۔
گھی یا مکھن >>> چار سے پانچ کھانے کے چمچ
بالائی >>> آدھا کپ
کچا پپیتا یا بیکنگ پاؤڈر >>> تھوڑا سا۔
پسا ہوا گرم مصالحہ >>> ڈیڑھ چائے کا چمچ
ادرک >>> ایک کھانے کا چمچ
پیاز >>> دو عدد درمیانے سائز کے
ہری مرچیں >>> چار سے پانچ عدد
ہرا دھنیا >>> حسبِ منشاء
پودینہ >>> حسبِ منشاء
نمک اور سرخ مرچ >>> حسبِ ضرورت
زیرہ  >>>  تقریباً ایک چائے کا چمچ
گرم مصالحہ پسا ہوا  >>> ایک چائے کی چمچ

ترکیب : مکھن اور کریم کو چھوڑ کر سارے اجزاء قیمے میں مکس کر لیں۔ اور قیمہ گرائنڈ کر لیں کہ باریک ہو جائے۔ آخر میں مکھن اور کریم بھی شامل کر لیں۔ چاہیں تو آخر میں ہی باریک کٹا ہوا دھنیا، پودینہ اور ہری مرچیں ڈال دیں۔ اچھی طرح قیمے کو مکس کر کے کچھ دیر کے لیے رکھ دیں۔ کباب بنانے سے پہلے ایک بار پھر قیمے کو مکس کریں۔ اور سیخوں پر کباب بنا کر کوئلوں پر گرل کر لیں۔
ٹماٹر، ادرک اور پیاز کی چٹنی کے ساتھ پیش کریں۔

چونکہ میرے پاس گرل کرنے کا وقت نہیں تھا۔ اس لیے فرائی ہی کرنا پڑے۔آپ سب کوئلوں پر ہی گرل کریں۔

Popularity: 11% [?]

آؤ بچو۔۔۔دوبارہ کھیلیں۔

راہبر کا خیال ہے کہ کچھ مختلف انداز کے سوالوں سے دوبارہ ٹیگ ٹیگ کھیلا جائے تو لیں شروع کرتے ہیں۔ عمار نے مجھے بھی ٹیگ کیا ہے۔ لیکن میرا خیال ہے کہ اگر دو، تین لوگوں کو ٹیگ کیا جائے تو بہتر رہے گا۔ اس لیے میں تین کو ہی ٹیگ کر رہی ہوں۔

کھیل کے قوانین مندرجہ ذیل ہیں ۔
الف۔ کھیل کے قوانین جوابات دیتے وقت ارسال کرنا ہوں گے۔
ب۔ جس نے آپ کو اس کھیل سے منسلک کیا ہے، اُسکی تحریر کا حوالہ دینا لازمی ہے۔
ج۔ سوالات کے اخیر میں آپ مزید پانچ لوگوں کو اِس کھیل سے منسلک کریں گے، اور اس کی اطلاع متعلقہ بلاگ پر نئی تحریر میں تبصرہ کر کے دیں گے۔

1۔ ونڈوز یا لینکس؟

ونڈوز۔

2۔ ہالی ووڈ یا بالی ووڈ؟

ہالی ووڈ۔

3۔ پیپسی یا کوک؟

مجھے فانٹا سب سے زیادہ پسند ہے۔ اس کے بعد کوکا کولا۔

4۔ سیب یا انگور؟

سبز سیب۔

5۔ کراچی یا لاہور؟

لاہور۔

6۔ پاپ میوزک یا راک؟

دونوں ہی نہیں۔

7۔ چائے یا کافی؟

چائے۔

8۔ عدنان سمیع یا عاطف اسلم؟

 عدنان سمیع۔

9۔ نہاری یا حلیم؟

ہممم ۔۔ دونوں ہی پسند ہیں۔ لیکن زیادہ نہاری۔ (منہ میں پانی آ گیا ہے۔)

10۔ لوو میریج یا ارینجڈ؟

ارینجڈ۔۔۔ لیکن لو بھی۔

11۔ فورمز یا بلاگ؟

ہمممم۔۔۔میرا خیال ہے ۔ بلاگ۔

 12۔ نواز شریف یا آصف زرداری؟

آصف زرداری۔

13۔ دوست یا کزنز؟

دوست۔

14۔ کرکٹ یا فٹ بال؟

فٹ بال۔

15۔ پرسکون یا پریشان؟

پر سکون۔

میں امن ، شگفتہ اور فرحت کو ٹیگ کرتی ہوں۔

Popularity: 14% [?]

امام ابوحنیفہ اور خلیفہ منصور

عباسی خلیفہ منصور سے اس کی بیوی کی شکایت یہ تھی کہ خلیفہ شوہر کی حیثیت سے عدل و انصاف نہیں کر رہا۔ منصور کو یہ بات تسلیم نہ تھی۔ آخر منصور نے ثالث کی تجویز رکھی۔ بیوی نے امام ابو حنیفہ کا نام تجویز کیا۔
امام ابو حنیفہ کو بلایا گیا۔ خاتون پردے کے پیچھے بیٹھی اور گفتگو کا آغاز ہوا۔ خلیفہ منصور نے گفتگو کو اس سوال سے اٹھایا کہ “ازروئے شریعت ایک مرد کو کتنے نکاح کرنے کی اجازت ہے؟“
“چار“ ابو حنیفہ نے مختصر اور سادہ سا جواب دیا۔
منصور نے فاتحانہ انداز میں پردے کی طرف رخ کر کے خاتون سے کہا “سنتی ہو؟“
“جی ہاں سنا۔۔۔“ خاتون نے جواب دیا اور اس کی آواز میں نسوانی موقف کے سلسلے میں دبی دبی پکار تھی۔ امام ابو حنیفہ سے آواز سنی تو معاملے کو بھانپ لیا۔ فوراً خلیفہ کی طرف رخ کر کے کہا “لیکن یہ اجازت اس شخص کے لیے خاص ہے جو عدل و انصاف پر قادر ہو۔ ورنہ ایک سے زیادہ نکاح کرنا ٹھیک نہیں ہے۔“
خلیفہ کے موقف کے خلاف یہ اعلائے کلمتہ الحق پوری جرات اور قوت کے ساتھ کیا گیا تھا۔ خلیفہ نے احساس شکست کے ساتھ سر جھکا لیا۔ پس پردہ خاتون اپنا مقدمہ جیت چکی تھی۔ ابو حنیفہ مکان پر واپس چلے گئے۔

جیسے ہی امام صاحب گھر پہنچے۔ ایک شاہی غلام خاتون کی طرف سے پچاس ہزار کی مالیت کا تحفہ لیے ہوئے پہنچا۔ اور کہا کہ یہ خلیفہ کی بیوی نے بھیجا ہے اور کہا ہے کہ آپ کی کنیز سلام عرض کرتی ہے اور آپ کی حق گوئی کی دل سے شکر گزار ہے۔
امام ابو حنیفہ نے اس بیش قیمت عطیہ کو قبول کرنے سے انکار کرتے ہوئے کہلا دیا : میں نے محض اپنا فرض ادا کیا ہے۔ جس کے پیچھے میری کوئی ذاتی خواہش اور غرض نہیں ہے۔

ذرائع: نویدِ سحر مجلہ

Popularity: 17% [?]

Ekeberg

Ekeberg

Ekeberg pic.

Ekeberg from Mawra on Vimeo.

Popularity: 17% [?]

ٹیگ

جہانزیب نے ٹیگ کا سلسلہ شروع کیا۔ رضوان نے مجھے ٹیگ کیا ہے، جس کے جواب حاضر ہیں۔

کھیل کے قوانین مندرجہ ذیل ہیں ۔
ا) کھیل کے قوانین جوابات دیتے وقت ارسال کرنا ہوں گے ۔
ب) جِس نے آپ کو اس کھیل سے منسلک کیا ہے، اُسکی تحریر کا حوالہ دینا لازمی ہے ۔
ج) سوالات کے اخیر میں آپ مزید پانچ لوگوں کو اِس کھیل سے منسلک کریں گے، اور اس کی اطلاع متعلقہ بلاگ پر نئی تحریر میں تبصرہ کر کے دیں گے ۔

1) اِس وقت آپ نے کِس رنگ کی جرابیں پہنی ہوئی ہیں؟

- جرابیں تو نہیں پہنیں۔

2) کیا آپ اس وقت کچھ سُن رہنے ہیں؟ اگر ہاں تو کیا؟

- گانا سن رہی ہوں۔ ( بانہوں کے درمیاں دو پیار مل رہے ہیں)

3)سب سے آخری چیز جو آپ نے کھائی تھی کیا تھی؟

-  آج امی نے زردہ بنایا تھا،ابھی وہی کھا کر آئی ہوں۔

4) سب سے آخری فلم کونسی دیکھی ہے؟

- کل ہی یوٹیوب پر ہی ایک بہت پرانی فلم “صرف تم“ دیکھی۔

5) آپ کا پسندیدہ قول کیا ہے؟

 -” اگر آپ برے ہیں تو یہ آپ کے حق میں برا ہے۔ اگر آپ اچھے ہیں تو یہ آپ کے حق میں اچھا ہے۔ لیکن اگر آپ بہت اچھے ہیں تو یہ آپکے حق میں بہت برا ہے۔”

دنیا کو جس قدر کسی نے پہچانا، اسی قدر اس سے بے رغبت ہوا۔

6)کل رات بارہ بجے آپ کیا کر رہے تھے؟

- یقیناً چیٹنگ کر رہی تھی اور ساتھ اردو محفل پر تھی۔

7) کِس مشہور شخصیت زندہ یا مردہ سے آپ مِلنا چاہیں گے؟

- شاید علامہ اقبال یا احمدی نژاد

8 ) غصہ میں اپنے آپ کو پرسکون کِس طرح کرتے ہیں؟

- بول کر جب تک سارا غصہ نکال نہ لوں، پرسکون نہیں ہوتی۔ اس لیے بول کر ہی سکون آتا ہے۔

9) فون پر سب سے آخر میں کِس سے بات ہوئی؟

- باہر گئی ہوئی تھی، امی کا ہی فون آیا تھا۔

10) آپ کا پسندیدہ تہوار کونسا ہے؟

- عید پر ہی مزہ آتا ہے۔

اب میں حجاب، راشد کامران، شکاری، دریچہ اور شاہدہ کو ٹیگ کرتی ہوں۔

Popularity: 29% [?]

Sognsvann

جمعہ کو ہم Sognsvann گئے تھے۔ جو کہ اوسلو کی ایک جھیل ہے۔ اور میں ویڈیو بنانے کے تجربے کرتی رہی۔ اور مجھے ابھی ویڈیو بنانے کا طریقہ نہیں آتا، اس لیے تنقید کرنے کا کــــوئــــی فـــائدہ نہیں۔ ہاں البتہ طریقہ بتا سکتے ہیں تو ضرور بتائیں۔

Popularity: 22% [?]

کیا عورت واقعی بےوقوف ہوتی ہے؟

اگر آپ یہ تحریر پڑھنے جا رہے ہیں، تو یہ بات ذہن نشین کر لیں کہ میں عورتوں کے خلاف بالکل نہیں ہوئی۔ یہ صرف ایک حقیقت لکھی ہے۔ کئی دنوں سے عورت کی بےوقوفیوں پر لکھنے کا دل کر رہا تھا۔ یہ سب اس کی روشنی میں لکھ رہی ہوں، جو سب مجھے اپنے ارد گرد سے دیکھنے کو ملا۔

دنیا میں سیانے لوگ بھی ہوتے ہیں اور بےوقوف بھی۔ اسی طرح کئی عورتیں بھی بہت سیانی ہوتی ہیں، اور کچھ بےوقوف اور کچھ بہت ہی زیادہ بےوقوف۔ اور یہی عورت ایک مرد کے سامنے بالکل ہی بےوقوف ہو جاتی ہے۔ تو دوسری طرف کئی عورتیں مردوں کو بےوقوف بنا دیتی ہیں۔ مجھے بےوقوف عورت پر شدید غصہ آتا ہے۔ (ہو سکتا ہے میں خود بھی بےوقوف ہی ہوں، لیکن کچھ بےوقوفیاں کرنے سے پہلے بہت کچھ سوچنا پڑتا ہے۔)

عورت کی عظمت کیا ہے۔ اگر عورت کو اس کا احساس ہو جائے تو شاید یہ بےوقوفیوں والے کام کرنا چھوڑ دے۔ عورت مرد کے جھانسے میں اتنی جلدی کیوں آتی ہے؟ دو میٹھے بول کسی نے بولے تو بس سب کچھ اس کو دان کر دیا۔ اسے ہی دنیا میں اپنا مخلص سمجھنے لگتی ہیں۔ اور کسی کی بات اس وقت تک اس کو سنائی نہیں دیتی، جب تک وہ انھیں دھوکا دے کر چلا نہیں جاتا۔
سب سے زیادہ تکلیف مجھے اس وقت ہوتی ہے، جب ایک پڑھی لکھی، باشعور عورت مرد کے سامنے جھک جاتی ہے۔ اور پھر اس کا کام کسی اور کی نہیں سننا ہوتا۔ اگر کوئی ان کو سمجھائے تو الٹا دوسرے پر دھاوا بول دیتی ہیں۔

عورت دوسری عورت کو اپنا دشمن کیوں سمجھتی ہے؟  اگر ایک ہی بات دو انداز میں دو لوگ (ایک مرد اور ایک عورت) ایک عورت کو بتا رہے ہوں گے، تو عورت کس کا یقین کرے گی؟ ایک مرد کا۔۔۔!! وہ سمجھتی ہے کہ دوسری عورت اس کی دشمن ہے۔ اس کی کئی وجوہات ہو سکتی ہیں۔ شاید اس کی ایک مثال ہمارا معاشرہ بھی ہے جہاں عورت کو عورت کا دشمن سمجھا جاتا ہے۔ اس بارے میں راشد نے بھی کچھ لکھا تھا۔ 1۔ رشتے دیکھتے وقت ایک عورت ہی دوسری عورت کو کس طرح ذلیل کرتی ہے۔ 2۔ ساس، بہو یا نندوں کے آپس کے جھگڑے۔ اور اس طرح کی کئی مثالیں ہیں۔

کچھ عورتوں کی بہت بری عادت ہوتی ہے، ہر کام میں آگے آگے ہوتی ہیں۔ اپنے بارے میں سمجھتی ہیں کہ وہ ہی سب کچھ کر سکتی ہیں، اسی دوران دوسری عورتوں کا کچھ نہ سمجھنا۔ اپنے آپ کو ہی ذہین فطین کا تمغہ دینا۔ ایسی عورت کو آخر میں بہت نقصان اٹھانا پڑتا ہے، اور اگر کوئی مسئلہ گڑ بڑ ہو جائے تو دبک کر بیٹھ جاتی ہیں اس وقت دوسروں کے پاس دوڑتی ہیں، کہ اب یہ کیا کریں۔

کچھ عورتیں شک کی بہت بری بیماری میں مبتلا ہوتی ہیں۔ اور آخر میں اسی شک کا انھیں نقصان اٹھانا پڑتا ہے۔ کچھ عورتوں کو دوسری عورتوں پر طنز کرنے کا بھی بہت شوق ہوتا ہے۔

لڑکیوں سے میری صرف ایک ہی گزارش ہے، کہ خدارا اپنے مقام کو اگر آپ نے ٹھیک رکھنا ہے تو اپنے حرکتوں کو درست رکھیں، کوئی ایسی حرکت نہ کریں ، جس کی وجہ سے دوسروں کی نظر میں آپ گر جائیں۔ کیونکہ عزت ہی سب سے بڑی چیز ہوتی ہے، یہ چلی جائے ایک بار، تو دوبارہ نہیں آتی۔ اپنے آپ کو اتنا مضبوط بنائیں کہ کوئی آپ کے حصار کو توڑ نہ سکے۔
اگر کسی لڑکی کو برا لگے تو معذرت۔  اور مجھے عورت دشمن بالکل نہ سمجھیں۔ میں ہمیشہ عورت کی حمایت کرتی تھی، ہوں اور کرتی رہوں گی۔

Popularity: 40% [?]

فٹ بال کھلاڑی:D

آج گھر واپسی پر ان بچوں کو راستے میں کھیلتا دیکھا تو سوچا ان کی اردو محفل پر فوٹو گرافی کے تھیم کے لیے تصویر لے لیتی ہوں۔ یہ سارے گراؤنڈ کا چکر لگا رہے تھے، شاید ان کا سیکھانے والا ایکٹو کر رہا تھا۔ میں نے تصویر بنانے کا پوچھا تو سارے اکھٹے ہو گئے، پھر اتنی دیر تک انہیں سمجھ نہ آئے کہ کھڑا کیسے ہوں، ہر کوئی اپنا اپنا سٹائل بنانے کی کوشش کر رہا تھا۔ میں نے ریڈی کہا تو ان کو اسی وقت سمجھ آ گئی کہ کیسے کھڑے ہونا ہے۔:D

Popularity: 41% [?]

17 مئی

آج ناروے کا قومی (آئینی) دن منایا جا رہا ہے۔ 17 مئی 1814 میں ناروے کا آئین منظور ہوا۔ جس میں ناروے ایک آزاد قوم ہونے کا اعلان کیا گیا۔ ناروے میں قومی دن کا آغاز ہمارے پاکستان کی طرح اسلحے کی نمائش اور فوجی پریڈ سے بالکل نہیں ہوتا۔ یہاں کے رواج کے مطابق بچے اس دن پریڈ کرتے ہوئے بادشاہ کے گھر تک جاتے ہیں۔ اور بادشاہ، ملکہ، شہزادہ، شہزادی بالکونی میں کھڑے ہاتھ ہلاتے رہتے ہیں۔

ہر سکول اپنے بچوں کو اس پریڈ کے لیے صبح اکھٹے ہو کر نکلتا ہے۔ جسے ہم 17 مئی ٹرین کہتے ہیں۔ بچوں نے ملک کے جھنڈے ہاتھوں میں پکڑے ہوتے ہیں۔ اور سنئیر کلاسز کے بچے سب سے آگے سکول کے بینرز کو اٹھائے ہوتے ہیں، بینڈز، میوزک اور قومی ترانے گاتے ہوئے بادشاہ کے گھر کے سامنے سے گزرتے ہیں۔ زیادہ تر بچے، بڑے، بوڑھے ناروے کا قومی لباس اس دن پہنتے ہیں۔ شاہی گارڈ بینڈ بجاتا ہوا بھی نظر آتا ہے اور مختلف شہروں میں توپوں کی سلامی بھی دی جاتی ہے۔

گریجویٹ سٹوڈنٹس (Russ) بھی اس دن کو خاص طور پر مناتے ہیں۔ اور اپنے اپنے سکولوں سے لمبی قطار میں پریڈ کرتے ہوئے بادشاہ کے گھر تک جاتے ہیں۔ ناروے کے ایک روایت کے مطابق گریجویٹ طلباء طالبات اپنے اپنے سبجیکٹس کے مطابق مختلف رنگوں میں پینٹس پہنتے ہیں۔ اور بہت الٹے الٹے کام کرتے ہیں. میرا بھائی بھی آجکل Russ بنا ہوا ہے، اور رُس ٹرین کے ساتھ گیا ہوا ہے۔ لیکن میں اتنے سالوں میں ایک بار بھی 17 مئی کے لیے باہر نہیں نکلی، چھٹی کے دن تو ویسے بھی صبح اٹھنے کا دل نہیں کرتا۔

اوسلو میں اس دن بے شمار لوگ اکھٹے ہوتے ہیں، اور ہر سال ٹی وی پر لائیو دیکھایا جاتا ہے۔ پریڈ سے واپسی پر بچے سکولوں میں واپس آ کر پارٹی کرتے ہیں۔ جس میں مزے کے کیک اور کھانے ہوتے ہیں۔

L 

 Source:

17 may pic. 

cake pic.

Popularity: 41% [?]

منظر نامہ

منظر نامہ ایک مشترکہ اردو بلاگ ہے۔ جسے ہم نے یعنی میں نے اور عمار نے چند دن پہلے ہی ترتیب دیا ہے۔ ہمارا مقصد اس بلاگ کے ذریعے اردو بلاگرز سے شناسائی اور ان پر فوکس کرنا ہے۔ چونکہ اردو بلاگرز کی ابھی ایک چھوٹی سی کمیونٹی ہے۔ تو ہم نے ان کو ایک جگہ اکھٹا کرنے کا سوچا ہے۔ ہم ایک دوسرے کو کیسے جانیں گے؟ اس کے لیے ہم اردو بلاگرز کا انٹرویو لیں گے، مزید اردو بلاگرز کو ایک مشترکہ عنوان دیا جائے گا، جس پر وہ اپنے خیالات کا اظہار کریں گے۔ آپ کے تعاون، تجاویز و آراء سے ہم اس میں مزید بہتری لا سکیں گے۔ اس طرح شاید ہمارے اردو بلاگرز متحرک ہو سکیں، اور بہت سے نئے اردو بلاگرز بھی ہم میں شامل ہو جائیں۔ اس سب کا ایک اور مقصد یہ بھی ہے کہ اردو بلاگنگ کے پہلے بلاگرز کو ہم ایک جگہ اکھٹا کر سکیں، تاکہ آئندہ آنے والے اردو بلاگرز کے علم میں ہو کہ اردو بلاگنگ کی تاریخ کیا رہی ہے۔

کچھ عرصہ پہلے  پاکستانی سپیکٹیٹر  والوں نے کچھ بلاگرز کے انٹرویوز لیے تھے۔ تو میرے ذہن میں خیال آیا کہ کیوں نا اردو بلاگرز کے اردو میں ہی انٹرویو لیے جائیں۔ سوچا کہ امن سے بات کرتی ہوں، لیکن امن بھی چلی گئی تو میرا خیال وہیں کا وہیں رہ گیا۔ کچھ دن پہلے مجھے کسی نے بتایا کہ عمار ان کا انٹرویو لینے کا کہہ رہا ہے۔ میں نے تو کوئی اور بات نہ کی نہ سنی، بس اسی وقت عمار کو میل کر دی۔ عمار تو جیسے پہلے سے ہی بالکل تیار بیٹھا ہوا تھا۔ بہرحال ہم نے چند دن کی سوچ بچار کے بعد فائنل کر لیا۔ اور نتیجتاً ایک بلاگ بنایا۔ اردو بلاگران کی ایک فہرست زکریا کے تعاون سے تیار کی۔ اور اردو بلاگنگ کی مختصر تاریخ لکھنے کا سوچا تو محب علوی کی ایک تحریر ہمارے کام آ گئی۔اگر آپ بھی ہماری کسی طرح مدد یا تجاویز دینا چاہتے ہیں تو اس ای میل پر ہم سے رابطہ کر سکتے ہیں۔

انٹرویوز کے حوالے سے ہم ان تمام بلاگرز کا بھی انٹرویو کرنا چاہتے ہیں، جنہوں نے اردو بلاگنگ چھوڑ دی، لیکن وہ پہلے اردو بلاگرز رہ چکے ہیں۔ ان میں سے چند ایک سے ہمارا رابطہ ممکن ہوا ہے، اور آپ کو جلد ان کے انٹرویو پڑھنے کو ملے گے۔ ہمارے انٹرویوز پرانے بلاگرز سے شروع ہوتے ہوئے آگے بڑھتے جائیں گے۔ امید ہے کہ بلاگرز تعاون کریں گے اور انٹرویو کے سوالوں کے جواب جلد از جلد بھیجیں گے، نا کہ ہمارے بھیجے ہوئے سوالوں کو بھول ہی جائیں۔۔ اور ان باکس میں وہ کہیں نیچے دب جائیں۔:(

امید ہے کہ آپ ہماری اس چھوٹی سی کاوش کو پسند کریں گے اور بلاگرز کے انٹرویوز کو انجوائے کریں گے۔ تو انتظار کیجئے کہ پہلا انٹرویو کس کا منظرِ عام پر آتا ہے۔ اس سلسلے کو شروع کر کے میں تو بہت پر جوش ہوں۔ امید ہے کہ آپ بھی ہوں گے۔ اب اگر کچھ مجھ سے اس پوسٹ میں بتانا رہ گیا ہو تو آپ کو عمار کے بلاگ پر بھی “منظر نامہ“ کے بارے میں ایک پوسٹ پڑھنے کو ملے گی۔

Popularity: 49% [?]